دورة تعلم الجافا من الصفر (الاساسيات حتى الاحتراف) - الجزء الرابع

1.10 ANATOMY OF A JAVA PROGRAM

طيب دلوقتي احنا عملنا برنامج ونفذناه عايزين نعرف بقي ازاي نفهم البرنامج ونعرف برده احنا محتاجين ايه علشان نعرف نكتب كود جافا صح .
اي برنامج جافا بيتكون من معظم وليس كل الحاجات دي:
1- Comments : يعني تعليق وبحطه لما اكون عاوز اكتب اي تعليق علي الكود او حاجة تفكرني بوظيفة الأوامر مثلا او اي جملة واللي بكتبه في التعليق ده الـ compiler بيتجاهله تماما ومش بيتنفذ ولا بيظهر في الـ run . عندي طريقتين بعمل بيهم comment:
a- لو عاوز اكتب تعليق من سطر واحد فقط بكتبه بعد // مثلا:

كود:

// this is a comment.

b- لو عاوز اكتب تعليق من اكتر من سطر بستخدم /* وبعدين اكتب اللي انا عاوزه وانهيه برده بـ */ مثلا:

كود:

/*this 
Is
A 
Comment.*/

2- Reserved Words: فيه شوية كلمات ماعرفش استخدمهم في تسمية المتغيرات او الكلاس او الميثود لأن ليهم معني معين عند الـ compiler ومقدرش استخدمهم في الكود. زي :

كود:

public, static, int, float, double, class, void, etc…

3-Modifiers: الجافا بتستخدم كلمات محفوظة عن طريقها بقدر اتحكم في صفات الداتا اللي جوه الكود من حيث انهي كلاس يقدر يشوفها ومين يقدر يشوفها ويعدلها وهكذا. املة علي الـ modifiers :

كود:

public, private, protected.

يعني مثلا الـ public معناها ان الداتا دي عامة اي كلاس يقدر يشوفها ويعدل فيها والـ private معناها ان الداتا دي مفيش اي كلاس تاني يقدر ولا يشوفها ولا يعدلها.
4- Statements : ودي بتبقي اي جملة بتعمل اي امر في الكود زي مثلا System.out.println("welcome"); وعندنا قاعدة جديدة في الجافا ان اي جملة بتنفذ امر لالالالالالالالازم تنتهي بـ (;)
5- Blocks : ودول اقواس المجموعة اللي في الكود ({) واي قوس بيتفتح لاز يتقفل بعد مااخلص الكود اللي فيه والكلاس عندنا بيبقي فيه اقواس بيتلم كل الكود اللي فيه بينهم وبرده اي ميثود نفس النظام وممكن تكون الأقواس متداخلة (nested) بمعني ان ممكن يكون فيه قوس جوه قوس زي كده:

6- Classes: اي برنامج جافا لازم يكون فيه علي الأقل كلاس واحد والكلاس عامل زي الإناء بيبقي فيه كل الكود بتاعي بس معناه اكبر من كده وهيتشرح معناه قدام شوية.
7- Methods : في برنامجنا اللي كتبناه لما قولنا System.out.println الجملة دي عبارة عن ايه؟ عندنا System.out ده عبارة عن object اما println دي عبارة عن ميثود موجودة في الobject ده والميثود ببساطة بيبقي فيها جمل من الكود وبتتنفذ بمجرد مابنادي الميثود دي وطبعا الكلام ده هيتوضح بالتفصيل قدام شوية. 
8- Main Method : ودي الميثود الاساسية في البرنامج بتاعنا ولازم تكون موجودة لأن ال JVM اوتوماتك بتنفذ اللي فيها .

كود:

 
public static void main(String[] args) {
// statements.
}

1.11 DISPLAYING TEXT IN A MESSAGE DIALOUGE BOX

جميل قوي لحد كده احنا دلوقتي عملنا برنامج بيطبع جملة علي الconsole طيب انا عاوز اعمل نفس البرنامج بس الجملة مش هتنطبع علي الconsole ولكن هطبعها في رسالة تطلع للمستخدم علي الشاشة.

كود:

 
1 /** This application program displays Welcome to Java!
2  *  in a message dialog box.
3  */
4 import javax.swing.JOptionPane;
5
6 public class WelcomeInMessageDialogBox {
7   public static void main(String[] args) {
8     // Display Welcome to Java! in a message dialog box
9     JOptionPane.showMessageDialog(null, "Welcome to Java!",
10       "Display Message", JOptionPane.INFORMATION_MESSAGE);
11   }
12 }

ممممم طيب عايزين نفهم الكود ده ؟؟؟
الاول كده احنا استخدمنا كلاس جاهز اسمه JOptionPane وفي الجافا الكلاسات الجاهزة بتتجمع في حزمة او package والكلاس ده موجود في الحزمة اللي اسمها javax.swing وعلشان الـ compiler يقدر يحدد مكانه استخدمت امر import وبالمناسبة لما جينا في اول برنامج نستخدم System.out.println معملناش اي استدعاء لأي كلاس تاني وده لأن الكلاس اللي احنا عاوزينه موجود في حزمة java.lang ودي حزمة بتكون موجودة اوتوماتك في اي برنامج جافا ومش محتاجة استدعاء.
ممكن برده اشيل جملة الإستدعاء في الاول بس كل ماهاجي استخدم الكلاس ده هستدعيه زي كده مثلا في السطر التاسع:

كود:

9 JOptionPane.showMessageDialog(null, "Welcome to Java!",

لو مكتبتش جملة الإستدعاء في الاول كل مرة هاستخدمه فيها اخليه كده:

كود:

9 javax.swing.JOptionPane.showMessageDialog(null, "Welcome to Java!",

وبعدين استخدمنا الميثود showMessageDialog واللي موجودة في كلاس JOptionPane وباستدعيها عن طريق اني بكتب اسم الكلاس وبعديه (.) وبعدين اسم الميثود والarguments اللي بتاخدها والMethods هتتشرح قدام شوية بالتفصيل.

الميثود دي بقي بتاخد ايه ؟؟؟ اول حاجة عملنا null ودي بتخلي الرسالة تظهر في منتصف الشاشة وبعد كده عملنا الجملة اللي هتنطبع وممكن نحط مكانها مثلا متغير (x) او اي حاجة عايزين نطبعها وبعدين عملنا العنوان اللي هيتكتب في الmessage box وفي النهاية عملت الجملة دي JOptionPane.INFORMATION_MESSAGE علشان تطلع شكل الأيكونة اللي عليها علامة (i)

طيب اكيد دلوقتي حد هيفكر طيب الحاجات دي انا اللي بحددها ولا ايه بالظبط؟
هقولك شرح الmethods بالتفصيل هييجي قدام شوية وهنعرف كل حاجة عنها بالتفصيل ان شاء الله.

ملف الشابتر كاملا :
Introduction To Java Programming CH1

وبكده نكون خلصنا شابتر واحد من الكتاب هسيب فترة للناس تطبق البرامج ولو فيه اي استسفسار انا تحت امركم.